Það gerist ekki svo ýkja ofta að á vegi manns verði glæpasögur sem eru það góðar að þær jafnast á við vel skrifaðar skáldsögur. Sama á við um samanburð á höfundum slíkra bóka. Ef glæpasögur eru það góðar að þær jafnast á við góðar ,,venjulegar” skáldsögur þá er tilhneiging hjá manni að hækka þær um flokk og einfaldlega flokka þær með skáldsögum.
Slíkt tilfelli er sú bók sem ég hef nýlokið við, Kim Novak badade aldrig i Genesarets sjö (Kim Novak baðaði sig aldrei í Genesaret-vatni hét hún í íslenskri þýðingu sem kom út 1999) eftir hinn sænska Håkan Nesser. Sagan er endurlit miðaldra manns til eftirminnilegs sumars snemma á sjöunda áratugnum. Móðir hans lá fyrir dauðanum með krabbamein og sögumaðurinn, þá fjórtán ára unglingur, fær leyfi til að verja sumrinu með jafnaldra sínum og átta ára eldri bróður, í sumarhúsi við vatn í námunda við heimabæinn.Koma íðilfagurrar konu kemur róti á bæjarlífið og litla veröld ábúendanna í kofanum og að lokum leiðir það til voveiflegs atburðar sem varpar myrkum skugga á sumrið sem fram að því hafði liðið hjá svo hægt og hljótt.
Þetta er falleg saga og vel sögð. Það er stilla yfir henni og undirliggjandi melankólisk angurværð. Eins og áður sagði er gæðastandard hennar ofar venjulegum glæpasögum og fyrir vikið freistast maður til að færa hana upp um flokk og setja hana í hóp hefðbundinna skáldsagna. Håkan Nesser er þekktur glæpasagnahöfundur. Þessi bók hans vekur með manni von um að til séu glæpasagnahöfundar sem virkilega hafa skáldgáfu en standa ekki bara í framleiðslu á formúlubókmenntum.
Sögupersónurnar vekja með manni samúð og sögulokin eru slungnari en þau virðast við fyrstu sýn. Alla vega svo slungin að höfundurinn er enn að stríða lesendum sínum, áratug eftir útgáfu, með ,,hvítbók” þar sem hann varpar ljósi á raunverulega sökudólga óhæfuverks sem atburðir bókarinnar byggja á. Svíar deila hins vegar fram á þennan dag um það hvort að hvítbókin er raunverulega heimildarrit eða áframhaldandi skáldaður spuni Nessers.
Nesser vekur sem sagt með manni von í marflatri veröld glæpasagnanna.
